الشمعة لمجموعة جيل جلالة

الشمعة لمجموعة جيل جلالة

لله يا الشمعة سالتك ردي لي سآلي
وش بيك فالليالي تبكي مدى انت اشعيلا
علاش يا الشمعة تبكي ما طالت الليالي
وش بيك يالي تتهيء لبكا فكل ليالي
وعلاش كتباتي طول الديجان كتلالي
وش بيك يالي وليتي من دا البكا عليلا
علاش كتساهر داجك ما سهرو نجالي
وش بيك يا لي ما رينا لك فلبكا مثيلا
وعلاش باكيا مدالك للباكي والسالي
وش بيك يا لي تنصرفي بدرارك الهطيلا
وعلاش باكيا روعتي ناس لهوى امثالي
وشبيك يالي ظاهر حالك حالة لى وحيلة
اذا نشوف لصفرارك يصفارلو خيالي
واذا نشوف دبلتك زادت لخاطري دبيلة

سلتك لله عد لي اش جرى لك
وعلاش باكية مدالك
وش كان قصتك وش نهو ذاك
اش نهو ذاك باش رق خيالك
وكمن قامتك حنحالك
وتبات باكية لحبابك وعداك
لي دون خفا اشكي بما فدخالك
و احكي قصتك نصغى لك
وانا قصيتي بها نتعداك

لو جيت يا الشمعة نحكي لك كل ما جرى لي
تنسى غرايبك و تسمعي لغريبتي طويلا
اذا باكية من نارك نيران في ادخالي
عد ت كل نار فداتي وجوارحي عليلا
واذا باكية بسقامك شوفي سقم حالي
من قيس وارثو بعد فناه سقم حب ليلى
واذا باكية بفراقك مفروق عن اوصالي
وعلى الفراق صابر وش صبرني على لعقيلا
وانت منين جاك احكي لي اولي وتالي
ما فارقة خليل بحالي ما فارقة خليلا

لله يا الشمعة سالتك ردي لي سآلي
وش بيك فالليالي تبكي مدى انت اشعيلا

سألتك لله عيد لي ما اصابك ........ اش كان قصتك فمصابك
لي احكي خطابك وانا نصغاك
الغريم فاللغا يسطابك
ويجول في حديثك وجواب لغاك
لو كنت ذات شاكية بهذابك......... يعماو بالبكا اهذابك
لو كان اللي كفاك تصرخي بلغاك

في صولة العمالة كنت وكانوا لي أبطالي
قبايل لجناح لا تحكي كيفها قبيلا
يشيدو بروج فلعمالة كل برج مالي
ويعمروا بروج من مواهب ربنا جزيلا
فيهم كيحجبو كيف الملوك فالليالي
وايام الربيع يخرجوا للبطايح الحفيلة
طلاب جاو الي هزمو بالحامية ابطالي
تركو عمالتي بعد العز فحالها ذليلا
وليت للعصارة شهد صفاوه من امصالي
صابوه قوت ودوا للذات الفانية العليلا
ومن امصالي صفاو شماعي يا اللي صغا لي
وحكايتي للقدام السيرة باقية طويلا

اسايلني يتدبروا لمسالك
تركوا حشاي في هالك
لو كان من الهند قوامي يهلك
داروني فتخوت زي ما يبدا لك
تبغي فقلبها عذالك
يتختوا حتى اسمتو بلاك
و خرجت من لتخوت لمهالك ......لقساوة الشموس كذلك
ذاتي يقصروا بهواجر وفلاك
وعلفتيل لفو توراقي يا لي صغا لي
بلا هوادة شعلوا فمواسطي فتيلا
نتفكر لعمالة و يزيد افراقها نكالي
نتفكر القصرة و تعود قلايدي هليلا
نتفكر العصارة وهجير الشاردة قبالي
ونقول وادب بكاي على ما صار لي اقبيلا
يحق لي بكاي على الغربة ما وجدت والي
يا مسلمين حبابي وسلامتي قليلا
شحال من عذاب جرى لي وبه ما نبالي
يا شوم ليعتي وبلايا وصادفت كل حيلا
شحال من هلاك جرى لي اما الشعيل تاليه
هذا لعشور فالواقع بيا غاية لقتيلا
يا وعدي و علاش يا الشمعة تبكي وانت فشان عالي
وجدوك يا الشمعة فمجالس رايقة حفيلا
وتبات يا الشمعة ترتي فضريح كل والي
وفشحال من مقام يشعلوك اهل الوسيلة
وتبات يا الشمعة بين اهل الشرح والامثالي
وعليك كيشرحو لكتب البازغة جميلا
وتبات يا الشمعة بين اهل المال والموالي
وعليك كيصرفو الاموال الطايقة الثقيلا
وتبات يا الشمعة بين العشاق ولغوالي
وعليك كيشاهد الخليل محاسن لخليلة
وتبات يا الشمعة فمساجد ربنا العالي
وعليك كيخرجو السلكات فليلة الفضيلة
نبغيك يا الشمعة تبكي في حرة الليالي
وانا على ذنوبي نبكي فمقام دار ليلى

لله يا الشمعة سالتك ردي لي سآلي
وش بيك فالليالي تبكي مدى انت اشعيلا

https://www.youtube.com/watch?v=1EmrNuPqehw

النسخة الأصلية
http://marocaudio.com/index.php?l=8&p=Pop%20Groupes/Jil%20Jilala_/Jil%20Jilala%2001/Chamaa.mp3&m=1