من قصائد الزجال المغربي الخضير الصديق

خلينـا
خلينـا اللـي فيـنــا يكفينـــا شوكة بو خلال مرشــوگة للعظـــامْ
و الدم ســــايل كبــــــاب حنا من هاذ العالم و راضيين بلقســامْ
خلــي كلامنا حتى هو يبــــان عـلاه فيومـــو يهز لعــــــلامْ
خلــي الدمـوع في عينيـنـــا و القـلـــوب حـزان و سقــــامْ
خليـنا حلاســة و عليـهــــا شرماتهــا لا لــور لا گـــــدامْ
راه التـاجر همـو غير الزيـــت و لا مصــاب زاد فـي الأحــــلامْ
غـدا يوقف علـى بـابـنــــا يدق دقــة يطيـــر لحمــــــامْ
و يدخــل مــع القبيــــلـة جـلاّبـة علـى ظهر مـولات لكمـــامْ
هاز صــاعو و الســـــؤال: الزيـت القديم المنسـي من أعــــوامْ
يـا تـاجر جمع جمـالك و بغـالك و رجع مــدراجكْ
خلـي ولادنا تقرا و شيوخنا ونسانا تعيـش و تهنـى
يـاك حنـا دراويش و داخليــن سوق ريـوسنــا
يـا عفـاك خلينا نشمــو هوانا كيـف بغـينــــا
و حتـــى يعـــود شوارنــا بيــديـنــــا
خليـنــا نسلك معــاك ليــام خليـنـــــــا
***
العيـاطة

عيطي يا العيـاطة نوحي يا النواحـة
جهدي تقـادى لسقـام فيـا نشـــادة
دموعـي على خـدي ولات عــادة
زمـانا حافـي يـا ناس بـلا زيــادة
و البـاقي غـادي لا أنـت لا هــذا
وحدك يـا راســي فريــد فــرادة
و التاقي اللي تاقي لا صياح لا جهادة
النسـا قتلونـي نوحي يـا النواحــة
طـاب نعـاسـي غيـّاط بلا عـوادة
ولفـي نسّـاني لا صـلاة لا عبــادة
أنـا وحـدي و إمتـى الشهـــادة
غير نوحي يا النوّاحة و عيطي يا العيّاطة
***
نسانا
*نسانا علانا نصيبوك في طلوع گمرة المشبوح
في شروق نهارك الفرحة في عيونا تلـــوح
لين غادى بلا وداع حبك ساكن منا الـــروح
ولفناك ولفك صعيب طاير في سمانا يبكي و ينوح
مهما گالوا نبكيك يا قلب بالخير يفـــــــوح
فراقك غريب يا الغريب عصفور جريح على الدوح
*****
حتى كان اللــي كان ...

حتى كان اللــي كان ... نوار الدفلة هدية من السلطـــــــان
الحصادة قلال و الفدان يا فدان، و في يومو ولى السلام قطــــران
هايم يبكي و يحكي قصة الجدران و كان طفل بزينو في حقولنا سرحان
غير عسل و زهار و نحلة و رمان، بصوت الخليل ينوح في سما الجنان
و علاش بنيتو سور يا قوم الطغيان و علاقتو علام الخلال و زتو في البهتان
حنا هما حنا الحق اليوم غدا يبان يبان... و حتى كان اللـــي كـــان.
* مهداة إلى روح الأخ و الصديق تكزارت محمد.
****
حياتــي

حياتــي رجعــت ملامـــة
بعد الفراح وغنا الحمامــــة
عودي الشريس نهامــــــة
و لى يطلب حصيدة و كمامـــة
أنا اللي دخلت الدنيا زعامــــة
رجعت هاز علام الندامـــــة
في حصوني معلق يرجى السلامة
*****
العذاب

العذاب وافي و جراحـــو شلــــى
الزمان حافي الجــوع و العــــرى
و مازال نعاني و صبري ما خلـــــى
محبوبي يجافي خربة في الخلـــــى
دمي حامي حامي و بويا آدم و أمي حوى.
*****

خذونا
خذونا يا أهلي علــى قد نيــــــة
و عطونا من ثمار الحكمة وصيـــــة
رانا غافليـــن غفلــة عسريـــة
حبينا الدنيا و صبنـــاها جنيــــة
و اليوم نعيدو الحكايـــة المنسيـــة
زينها خال في وجه طفلة ورديـــــة
حبها و سال عيونها السهرانة هواريــة.
*****
سالوني

سالوني يا نا عن الأصحاب گاع دوك الصحاب
نحكي ليكم عنهم حكاية غير قربو لقلم و الدواية
و باش تبدا الحكاية نسمي بالله و محلاها بداية
و عنهم المعاني جاية بالزغاريد و هازة راية
يهولوني في أحلامـــــي و صحايـــا
و يحفر خنادق گدامــــي وورايـــــا

****

لا أريد أن أفارقك أيها القلم و لا أنت أيها الكتاب فالموت أهون من فراقكما.

****

غيـر صـدق القـول

غيـر صـدق القـول و عيـــش لـوفــى
الدنيــــا دايــزة من اليــوم لغــدوى
النزوة فايتـــة يبقــى غير النقـــــى
الحلال زين و اللي كرهو خليــه لشقــــى
يا خليلي فارقنــي راني باغي لهنــــــى
الزاد قليل يا حصرة و عوامي بلا شتــــــى
تمنيت رواحي بكري كرهت يا زمان الفوضـــى
كلامهم الخاوي فوق راسي تاج بلا معنـــــى
فين سيـفنا اللـي كان مسلول كلو دهب و فضـة
ياك عكثرو لديـن و الغراب في سمانـا عــلاى
و تخلط مــانا بالطيــن من بعد الصفــــى
ولصــوات كثرات إمــا معـانــا إمــا لا.
*****

وقفــوا

وقفــوا لا طيحــــوعـلاش وليتـــــو
تقلل ليــكم لعراض مـا زال أش بيتـــــو
عتـو شمتــة بين لعديان تاريخكم كيتـــــو
أش بين نشوف أش بين نگول كلامكم كلو مليتـو
ليهود تسخر فلسطين تضرب بلحجر أش كليتــو
لفلوس كثيـرة بزاف كمنادف عليها كزيتــــو
شربو شربو راه عرگنا فوك الكانون هو اللي غليتو.
*****
علاش

علاش يـا هلــي مرســــولنا ما بلغ مـرادو
علاش يا التايهيــن الحر فينـا ما وصل جــوادو
علاش مـــول الگـــافلة نســـــى زادو
علاش سيـفنـــا اليــوم هجر حــــــدادو
علاش الردّاد ولــى معلم والمعلم ولــــى ردّادو
علاش لحبيـــــــب جفى حبيـــب فــوادو
ياك الماضــي و لمشطر فينــا تقلل عراضــو
****
زارع الخيــر

يـا زارع الخيــر حبـــــة و يــا زارع الشــر ياســــر
مــول الخيــــر ينبــــى مــول الشـــر خاســــــر
مطـــرود بـلا سبـــــــة من الأهــوال و الدم الغــــادر
وليت في البهــــى كـذبـــة و مـن كذوبهم جيـت نافـــــر
من القزديـــر للقبـــــــة و من القبـة قربت نسكن المقابــر
شريـف من وســط الطلبــــة تعرفني البـروج و قمح المطامــر
نبكـي يا صحـاب الجدبـــــة المغنـــى وحيد في ليلو ساهــر
حالـــي اليـــوم ذبحــــة غيـر اربح معروف أصلك فاجــر
و الكــلاب صربــة صربـــة و السبع سبع و الحمـار ع حمــار
و الـدم غلـى عاد شربـــــة باغـي نعيــش يكفـى يا الكافر
******

زمانا حار يرد الشريف هداوي
يعود هاز قراقب وسنتير كناوي
يقول الحق ضاع لا دوا يداوي
حكمنا الظلم حاط فوقنا جناوي
لبسنا قشاشب بعد الحرير والكساوي
وكلمنا الزين المرصع المعاني رجعو خاوي
هداوي والحق نقول وربي لي بلاني
الدنيا رميتها ورايا مايهموني عدياني
كلمة السلام حكيتها وراني من صهدها نعاني
هداوي مانبيع بخور لا جاوي
عندي ألف حديث وحديث واش يساوي
القومان عرات نيابهارخات سلاكها
نطيح ولا نوض الهداوي اليوم مرادها
وحبابي كلها سد عليه بابو وبانو حبابها
تفكرت بلادي و ولادي وريحة ترابها
رجعت عقلي لوقات الصغر وأيامها
كنت جدي غزال طايش فغيابها
الكل يعرفني الجبال والطرقان وجنابها
واش المعمول الضن خاب وقفات على خرابها
البال جن يا سيادنا شكون اسبابها
النسا ولا المال قالو العارفين سيادها
تهت فالدنيا باغي نعرف عبادها
لقيت الحاضي نايم على وسادها
وقلة كلوها وكلو زادها
بحالي وببحالك شطبها وعوادها
مزروعين بزز فحقولها و وادها
سامحوني الكلام سبق لساني وعقلي ما رادها
جيبو قلمي ودوايتي تحكي على بعادها
قربو مني بغلتي سرجها و وتادها
أنا راحل لا تنساو الصينية الكيسان وبرادها
قاصد بلاد نصيب مكاني فيها
ما تجور عليا يكون الجهل ناسيها
والهداوي يرجع شريف حر من مواليها
يفهمو حديثي والكلمة تلقى معانيها
وأشعاري يشوفها العمى الزنزون يناديها
والمجنون يعقل حكمتي ينطق بيها
بشر واحد مدمر أرضنا وخاليها
ديورو شلى برواحنا وبحورنا بانيها
فين أرضي نشفات بمطامرها وحاسيها
غير خلوني حتى الدفلة أنا عاشقها وباغيها
هداوي ونهايتي بروحي شاريها.

merciiiiiiiiiiiiiiiii

قصائد جميلة ورائعة شكرا عزيزتي على المجهود
ننتظر جديدك مشاركاتك بشوق

» التعريف بثاني بحور شعر الملحون المغربي
» اجمل قصائد ابو نواس
» كتابات في الزجل المغربي
» قصائد زجلية مسفيوية
» أخ جزائري يحب النغم المغربي